Mikil flóð hafa verið í Japan undanfarið í kjölfar mikilla rigninga og hafa á annað hundrað manns látist og milljónir hafa þurft að yfirgefa heimili sín. Dýrin fara ekki varhluta af þessum miklu flóðum frekar en mennirnir. Smáhesturinn Leaf sást hverfa ofan í vatnsmikla á í vikunni. Óttast var að þessi níu ára gamla hryssa hefði drukknað. Leit bar engan árangur í fyrstu.

En þegar flóðin fóru að sjatna var hringt í umsjónarfólk Leaf og þeim tilkynnt að hún væri fundin, uppi á húsþaki. Hún var þakin aur og meidd á einum fæti en annars í góðu ásigkomulagi.

Enginn veit hvernig Leaf endaði uppi á húsþaki því íbúar á svæðinu segja að vatnið hafi aldrei náð svo hátt að það hefði getað borið hana upp á húsþak. Það var síðan ákveðinn höfuðverkur að koma henni niður af þakinu en gulrætur gerðu sitt til að halda henni rólegri og síðan var henni komið inn um glugga á húsinu og niður stiga og út.