Risastór svört steinkista fannst nýlega við fornleifauppgröft í Alexandríu í Egyptalandi. Kistan er 265 sm á lengd, 185 sm á breidd og 165 sm á hæð. Þetta er stærsta steinkista sem fundist hefur í Alexandríu. Fornleifafræðingar eru furðu lostnir yfir þessari merku kistu sem er talin vera um 2.000 ára.

Kistan fannst við uppgröft egypskra fornleifafræðinga eftir að grafhýsi kom í ljós þegar unnið var við byggingaframkvæmdir. Samkvæmt egypskum lögum þurfa byggingaaðilar að grafa lóðir alveg upp áður en byggingaframkvæmdir hefjast.

Kistan er úr svörtu graníti og fannst hún á fimm metra dýpi undir lagi af múrblöndu. Sky hefur eftir Dr Ayman Ashmawy að þetta þykka lag af múrblöndu á milli kistunnar og yfirborðsins bendi til að hún hafi ekki verið opnuð síðan henni var lokað um 35 árum fyrir upphafsár tímatals okkar.

Fornleifafræðingar ætla nú að reyna að komast að hvað er í kistunni án þess að valda skemmdum á henni.

Nærri kistunni fannst einnig mjólkursteinshöfuð en getgátur eru uppi um að það sé líkneski af höfði eiganda grafarinnar.

Þessi fornleifafundur er talinn mjög merkilegur og afar sjaldgæfur því grafræningjar hafa farið ránshendi um grafir sem þessar í gegnum aldirnar og því eru þær oft tómar.