Brasilískir vísindamenn telja að líf geti hugsanlega þrifist á plánetunni Ross 128b því þar sé hitastig með þeim hætti að fljótandi vatn geti verið þar. Vísindamennirnir hafa rannsakað þetta síðan plánetan fannst á síðasta ári. Talið er að plánetan sé úr föstum efnum og á „byggilegu“ svæði á braut um sólu sína.

Í tilkynningu frá brasilísku vísindamönnunum kemur fram að margt sé enn óljóst um plánetuna, til dæmis hvernig jarðfræðileg virkni sé þar. En þrátt fyrir þetta hafi tekist að styrkja rök fyrir að þar sé hitastig með þeim hætti að fljótandi vatn geti verið til staðar á yfirborðinu. Sól plánetunnar nefnist Ross 128 og er svokallaður rauður dvergur sem þýðir að hún er miklu minni og kaldari en sólin okkar.

Niðurstöður rannsóknarinnar hafa verið birtar í the Astrophysical Journal.

En þótt þessi niðurstaða liggi fyrir er ekki þar með sagt að við getum skotist til Ross 128b til að kanna málið því plánetan er í 11 ljósára fjarlægð frá jörðinni. Með núverandi tækni tekur það okkur 191.251 ár að „skjótast“ þangað.