100 manns hafa smitast af salmonellu í Bandaríkjunum á undanförnum mánuðum. Talið er að smitið megi rekja til Honey Smacks morgunkorns frá Kellogg‘s og hefur það nú verið innkallað. Einkenni salmonellusmits eru niðurgangur, hiti og krampar. Einkennin gera vart við sig á fyrstu 72 klukkustundunum eftir smit.

Tilkynnt var um fyrstu smitin þann 3. mars og þau nýjustu nú í byrjun júlí. Farsóttarstofnun Bandaríkjanna sagði í gær að 27 ný smit hafi greinst á undanförnum dögum. 30 hafa verið lagðir inn á sjúkrahús vegna smitsins. Í flestum tilfellum ganga veikindin yfir á fjórum til sjö dögum en sumir þurfa að leggjast inn á sjúkrahúss vegna alvarlegs niðurgangs. Salmonella getur verið banvæn ef hún berst frá innyflum út í blóðrásina og þaðan út um allan líkamann.

Bandaríska matvælaeftirlitið hvatti í gær neytendur til að borða ekki Honey Smacks vegna hættu á salmonellu. Þá voru verslanir hvattar til að taka það úr sölu en enn er verið að selja það í sumum verslunum þrátt fyrir að það hafi verið innkallað í júní. CNN skýrir frá þessu.