Um hádegisbil í gær strauk Kristofers Kastellanoss, 25 ára, frá fangaflutningabíl á milli Gautaborgar og Sala í Svíþjóð. Hann afplánar dóm fyrir morð og er talinn hættulegur. Fjölmennt lögreglulið leitar hans nú og hefur lögreglan hvatt íbúa á svæðinu til að halda börnum innandyra. Lögreglan óttast að Kastellanoss kunni að taka gísla ef hann telur að lögreglan sé að ná honum.

Þegar verið var að flytja Kastellanoss og fleiri fanga á milli Gautaborgar og Sala um hádegisbil í gær var stöðvað við Bäckedalen í Finnerödja. Heimildir Aftonbladet herma að það hafi verið gert þar sem einn fanganna hafi þurft að pissa. Kastellanoss nýtti þá tækifærið og strauk frá fangavörðum og hljóp inn í skóg.

Lögreglan hóf þegar í stað umfangsmikla leit að honum og var leitað úr lofti og hundar notaðir. Leit hefur staðið yfir í nótt en hefur engan árangur borið enn sem komið er.

Lögreglan hvatti íbúa á svæðinu til að halda sig innandyra í gær og læsa bílhurðum og hafa rúður alveg uppi ef þeir þyrftu að fara á milli staða. Þetta var gert til að reyna að koma í veg fyrir að Kastellanoss taki gísla. Þá var fólk hvatt til að halda börnum sínum innandyra á meðal leit stendur yfir.

Það hefur vakið undrun margra að Kastellanoss hafi getað flúið frá fangavörðunum en hann var handjárnaður og berfættur.