Á ellefta tímanum varð umferðarslys við Gnoðarvog en þar ók 17 ára stúlka léttu bifhjóli á vegg. Hún slasaðist á ökla og var flutt á sjúkrahús með sjúkrabifreið. Á tíunda tímanum í gærkvöldi var akstur 18 ára ökumanns stöðvaður á Vesturlandsvegi við Suðurlandsveg en bifreiðin sem hann ók mældist á 188 km/klst. Ökumaðurinn var færður á lögreglustöð og sviptur ökuréttindum.

Á áttunda tímanum í gærkvöldi var tilkynnt um 4 unga veggjakrotara í undirgöngum við Fjallkonuveg. Einn þeirra náðist og verður hann kærður fyrir eignaspjöll enda var verið að vinna skemmdarverk á eigum almennings.

Um klukkan níu í gærkvöldi var tilkynnt um innbrot í hjólhýsi í Bryggjuhverfi. Sængum og koddum og ýmsu fleiru var stolið úr hjólhýsinu.

Frá því rétt rúmlega átta í gærkvöldi til rétt rúmlega níu voru þrír karlmenn handteknir í miðborginni en allir voru þeir í annarlegu ástandi og voru því vistaðir í fangageymslu.

Skömmu fyrir miðnætti kom íbúií Eskihlíð að sofandi manni í geymslu sinni. Sá mun líklegast hafa brotið glugga til að komast inn. Honum var vísað á brott af lögreglumönnum.

Um hálf ellefu í gærkvöldi datt ofurölvi maður í strætisvagni við Arnarsmára. Maðurinn skarst á höfði og var fluttur á sjúkrahús með sjúkrabifreið.

Fjórir ökumenn voru handteknir frá því síðdegis í gær þar til í nótt en allir eru þeir grunaðir um akstur undir áhrifum fíkniefna. Einn þeirra reyndist vera sviptur ökuréttindum og var um ítrekað brot hans að ræða á þeirri sviptingu.