Ísjakinn er ekki stór í samanburði við aðra ísjaka við Grænland en þó mjög stór. Íbúar í þorpinu, 169 talsins, hafa nú verið fluttir frá strandlengjunni því óttast er að ísjakinn brotni eða hvolfi og myndi þá flóðbylgju. Stórt stykki brotnaði af honum fyrr í dag og myndaði litla flóðbylgju. Uppptöku af því er hægt að sjá neðst í fréttinni.
Ísjakinn situr fastur á landgrunninum um 100 metra frá ströndinni. Hann kemur úr Upernavik ísstraumnum sem liggur nokkra kílómetra sunnan við þorpið en óvenjulegt er að svo stór ísjaki komi nærri þorpinu. Keld Quistgaard, sérfræðingur hjá Dönsku veðurstofunni, sagði í samtali við Danska ríkisútvarpið að hugsanlega hafi röð tilviljana valdið því að ísjakinn kom að þorpinu. Nú sú nýtt tungl og því stórstreymt og það geti hafa valdið því að jakann rak að þorpinu.
Quistgaard sagði að full ástæða væri til að hafa áhyggjur því þegar sjávarstaðan lækkar geti orðið spenna í ísjakanum sem geti þá hrunið saman og þá muni mikið magn af sjó færast úr stað á skömmum tíma.
Hann áætlar að stykki sem sést brotna af ísjakanum í myndbandinu hér fyrir neðan vegi nokkur þúsund tonn.