Á föstudaginn var Mohammad Azam, 27 ára, á gangi með tveimur vinum sínum í Karnataka á Indlandi. Félagarnir stoppuðu og buðu hópi barna súkkulaði sem einn þeirra hafði keypt í Katar. Eitt barnanna byrjaði fljótlega að gráta og í kjölfarið gripu margir fullorðnir á svæðinu til aðgerða.

Á samskiptaþjónustunni WhatsApp hafði verið orðrómur um að hópur barnsræningja væri að störfum á svæðinu. Þetta varð til þess að fólk réðst á þremenningana sem náðu að flýja frá staðnum en ekki vildi betur til en að á flóttanum rákust þeir á hóp um 2.000 manna sem höfðu verið kallaðir á staðinn í gegnum WhatsApp.

Þremenningarnir voru barðir og sparkað í þá í tæpa klukkustund. Einnig voru þeir barðir með steinum. Lögreglumenn reyndu að koma þeim til bjargar og slösuðust þrír þeirra.

The Guardian segir að Azam hafi látist af völdum sára sinna skömmu eftir að ofbeldinu linnti en vinir hans tveir eru í lífshættu. Lögreglan hefur handtekið 25 manns vegna málsins. Rúmlega 20 hafa verið drepnir á undanförnum tveimur mánuðum vegna orðróms um að verið væri að ræna börnum.