Leonard Richards er 75 ára og afplánar lífstíðarfangelsisdóm í Minnesota í Bandaríkjunum fyrir tvö morð sem hann framdi á níunda áratugnum. Hann myrti þá hálfsystur sína og lögmann sinn. Dómurinn er bundinn því skilyrði að hann getur ekki sótt um reynslulausn eða náðun. En þrátt fyrir að sitja í fangelsi er Richards í framboði til öldungadeildar Bandaríkjaþings.

Samkvæmt lögum getur hann boðið sig fram til setu á Bandaríkjaþingi en ekki til setu á þingi Minnesota.

Þetta er ekki í fyrsta sinn sem Richards er í framboði því hann hefur áður reynt að komast á þing. Hann bauð sig fram í forkosningum demókrata um þingsæti 1992 og hlaut þá rúmlega 14.500 atkvæði. Hann reyndi aftur fyrir sér 1994 og fékk þá rúmlega 4.000 atkvæði. Svo er spurningin bara hvernig honum gengur að þessu sinni.

En svo er þeirri spurningu ósvarað hvernig yrði tekið á því ef svo ólíklega vildi til að Richards næði kjöri. Fengi hann þá að skjótast á þingfundi í Washington eða yrði að færa þingfundi í fangelsið til hans? Nú, eða þyrfti hann alltaf að kalla varamann inn fyrir sig?