Í gær loguðu skógar- og gróðureldar á um 50 stöðum í Svíþjóð, allt frá Jokkmokk í norðri til Korsberga í suðri. Slökkviliðsmenn eiga fullt í fangi með að berjast við eldana og segja að ástandið hafi aldrei verið verra á síðari tímum í landinu. Óhætt er að segja að Svíþjóð logi endanna á milli.

Jakob Wernerman, aðgerðastjóri hjá almannavörnum, sagði í samtali við Aftonbladet að almannavarnir hvetji alla viðbragðsaðila til að vera undir það búnir að ástandið geti orðið enn verra. Víða þurfa slökkvilið og aðrir viðbragðsaðilar á liðsauka að halda en hann er erfitt að fá því ástandið er svo slæmt um allt land. Eldar hafa logað í nær öllum lénun landsins, það eru aðeins Skánn, Halland og Gotland sem hafa sloppið fram að þessu.

Eldarnir sem loguðu í gær voru allt frá litlum eldum til stórra skógarelda. Verst er ástandið í Dalarna, Jämtland og Gävleborg. Þar vinna viðbragðsaðilar hörðum höndum að því að ná tökum á eldunum en hefur lítið orðið ágengt.

Sænska veðurstofan segir að miklir þurrkar séu í landinu og því þurfi ekki nema lítinn neista til að mikið bál verði af.

Sænsk stjórnvöld hafa beðið ESB um aðstoð vegna eldanna og er hún byrjuð að berast. Í gær komu 8 norskar slökkviþyrlur til aðstoðar og á morgun eru tvær ítalskar slökkviflugvélar væntanlegar til Örebro.