Maður um tvítugt var skotinn til bana á götu úti í Rosengård í Malmö í gærkvöldi. Lögreglan leitar nú fjögurra manna, sem óku á skellinöðrum, sem eru grunaðir um að hafa skotið manninn til bana. Einn hefur verið tekinn til yfirheyrslu en ekki liggja fyrir upplýsinga rum hvort hann er grunaður um aðild að morðinu.

Tilkynnt var um skothríð á Von Rosens vegi í Rosengård um klukkan 21.30 í gærkvöldi. Á vettvangi fundu lögreglumenn unga manninn liggjandi á gangstéttinni og hafði hann verið skotinn. Ekki tókst að bjarga lífi hans. Aftonbladet segist hafa heimildir fyrir að maðurinn hafi komið við sögu hjá lögreglunni. Blaðið segist hafa heimildir fyrir að fjórir menn, á skellinöðrum, hafi ekið að manninum og skotið hann.

Síðar í gærkvöldi var lögreglan kölluð að Persborgsgatan í Malmö en þar var eldur í skellinöðru. Verið er að rannsaka hvort sú skellinaðra hafi verið notuð við morðið.