Í nýlegri umfjöllun B.T. um kynferðisbrot af ýmsum toga var rætt við 44 ára karlmann sem var nauðgað af konu fyrir 19 árum. Með því að deila sögu sinni vill maðurinn reyna að brjóta niður það tabú sem nauðganir, framdar af konum, eru.
Hann var á tónleikum með vini sínum. Þeir fóru heim til vinarins ásamt konu að tónleikum loknum. Þar skemmtu þau sér og drukku áfengi. Þar sem maðurinn var þreyttur fór hann fyrstur að sofa og man ekkert fyrr en hann vaknaði við að konan var að nauðga honum.
„Ég vaknaði upp við að hún var á fullu. Ég spurði hvað í fjandanum hún væri að gera. Þá sagðist hún bara vera gröð og langaði til að stunda kynlíf.“
Hann sagði að konan hafi verið við að „ljúka sér af“ þegar hann vaknaði og hann hafi ekki náð að bregðast við vegna ástands síns.
„Það er eiginlega undarlegt að ég skyldi ekki vakna fyrr. Ég skil ekki hvernig ég gat „staðið mig“ án þess að vera „til staðar“.
Hann sagði að í fyrstu hafi hann bara hugsað með sér að þetta hefði verið mjög undarleg lífsreynsla en síðan rann upp fyrir honum að hann hefði í raun verið beittur kynferðislegu ofbeldi, hafi verið nauðgað.
Hann kærði málið ekki og segist skilja karla, sem ekki kæra ofbeldi sem þetta, vel.
„Ef ég hefði farið lengra með þetta er ég ekki í vafa um að fólk hefði gert grín að mér. Nær öllum sem ég hef rætt þetta við finnst þetta fyndið. Ég var þolandi kynferðisofbeldis en af því að ég er karl þá hlær fólk að því. 99 prósent hafa brugðist þannig við. Það er nánast bara konan mín sem hefur ekki hlegið. Fólk tekur mann ekki alvarlega og segir að maður eigi bara að vera ánægður því maður sé karl. Þetta er algjörlega óþolandi. Þótt maður sé karl getur maður líka verið fórnarlamb.“