Þrátt fyrir að góðir sigrar hafi unnist á sveitum hryðjuverkasamtakanna sem kenna sig við Íslamska ríki (IS) í Írak og hlutum Sýrlands eru samtökin enn ógn og hún fer vaxandi. Þetta kemur fram í nýrri skýrslu frá Sameinuðu þjóðunum. SÞ áætla að um 30.000 liðsmenn IS séu enn í Sýrlandi og Írak. Þá nær net samtakanna út um víðan heim.

Í skýrslunni kemur fram að þrátt fyrir að búið sé að ráða niðurlögum IS í Írak og stórum hlutum Sýrlands sé líklegt að „leynileg útgáfa“ af samtökunum muni lifa af í báðum löndum. Þetta er sagt mögulegt vegna mikils stuðnings við IS í Afganistan, Líbíu, Suðaustur-Asíu og Vestur-Afríku. Skýrslan var unnin af ýmsum sérfræðingum fyrir öryggisráð SÞ.

Margir liðsmenn IS og háttsettir félagar hafa verið drepnir í átökum undanfarin misseri og margir liðsmenn hafa flúið frá átakasvæðunum en samt sem áður eru allt að 30.000 enn til staðar í Írak og Sýrlandi. Mörg þúsund þeirra eru frá öðrum löndum. Sumir eru virkir og eru að berjast en aðrir leynast hjá fólki sem styður málstaðinn og á afskekktum svæðum.