Donald Trump telur sjálfan sig vera snilling hvað varðar utanríkismál en eitt á þessi mikli snillingur (að eigin mati) erfitt með að skilja og það eru tímabelti heimsins. Trump er mjög hvatvís og ef honum dettur í hug síðdegis eða seint að kvöldi að bandarískum tíma að hringja í erlenda þjóðarleiðtoga vill hann gera það strax. Aðstoðarmenn hans hafa margoft þurft að grípa inn í og benda honum á að tímasetningin sé ekki viðeigandi því viðmælandinn sé væntanlega steinsofandi enda hánótt hjá honum.

Politico skýrir frá þessu. Fram kemur að Trump hafi eitt sinn ætlað að hringja í Shinzo Abe, forsætisráðherra Japan, um miðjan dag að bandarískum tíma en þá var hánótt í Japan.

„Hann var ekki góður í að skilja að þjóðarleiðtogi gæti verið 80 eða 85 ára og ekki vakandi eða á rétta staðnum klukkan 10.30 eða 11 að kvöldi.“

Hefur miðillinn eftir einum starfsmanni Hvíta hússins.

„Þegar hann vill hringja í einhvern þá vill hann hringja í hann. Hann er mjög hvatvís á þennan hátt. Hann hugsar ekki um hvað klukkan er eða hver á í hlut.“

Sagði annar starfsmaður.

Sarah Huckabee Sanders, fjölmiðlafulltrúi Hvíta hússins, sagði í samtali við Politico að „erlendir þjóðarleiðtogar kunni vel að meta að forsetinn sé reiðubúinn til að svara hringingum þeirra að degi sem nóttu“.