Á tíunda tímanum í gærkvöldi barst sænsku neyðarlínunni fyrsta símtalið um brennandi bíla í Frölunda og á Frölundatorgi í Gautaborg og skömmu síðar bárust samskonar tilkynningar frá Hjällbo. Síðar bárust tilkynningar um brennandi bíla í Trollhättan og þar grýttu ungmenni lögregluna með grjóti. Á myndum og myndbandsupptökum er ekki annað að sjá en að brennuvargarnir, sem voru nokkrir, hafi gengið skipulega til verks. Lögreglan vill ekki útiloka að um skipulagðar aðgerðir hafi verið að ræða.

Tilkynnendur töluðu um að 5-6 dökkklædd ungmenni hafi kveikt í bílunum að sögn talsmanns lögreglunnar. Ungmennin eru síðan sögð hafa hlaupið á brott frá vettvangi.

Um 80 bílar skemmdust í eldunum. Á upptökum má sjá að svartklætt fólk brýtur rúður í bílum til að hella eldfimum vökvum inn í þá og leggur síðan eld að þeim.

Enginn hefur verið handtekinn vegna málanna.

http://https://www.youtube.com/watch?v=FVmgHkx7dY8