Leiðtogar Suður- og Norður-Kóreu, Moon Jae-in og Kim Jong-un, ætla að hittast í Pyongyang í Norður-Kóreu í næsta mánuði til að ræða málefni ríkjanna. Á laugardaginn hefjast Asíuleikarnir í Indónesíu og munu lið Kóreuríkjanna ganga þar saman inn og ríkin senda sameiginleg lið til keppni í nokkrum greinum. Það virðist því sem samskipti ríkjanna fari stöðugt batnandi.

Ráðherrar frá báðum ríkjum funduðu í landamærabænum Panmunjom á mánudaginn og voru ýmis mál á dagskrá en leiðtogafundurinn var óneitanlega stærsta málið. Rætt var um Asíuleikana og að leyfa fjölskyldum, sem eru aðskildar vegna Kóreustríðsins, að hittast.

Leiðtogafundurinn hefur ekki verið dagsettur en þétt dagskrá er hjá báðum leiðtogunum og ekki er víst að undirbúningur fundarins muni ganga snurðulaust fyrir sig. Cho Myoung-gyon, ráðherra sameiningarmála í Suður-Kóreu, segir að það séu ákveðnar hindranir sem þarf að yfirstíga áður en af fundinum getur orðið. Kjarnorkumálin eru ein þessarra hindrana.