Blaðamennirnir sem um ræðir starfa báðir hjá netmiðlinum Mittmedia. Sænska ríkisútvarpið hefur eftir Karin Näslund, aðalritstjóra miðilsins, að það sé rétt að blaðamennirnir hafi verið skotmörk.
„Já, ég get staðfest að því miður er þetta nýr raunveruleiki fyrir blaðamenn. Lýðræðislegu verkefni okkar er ógnað af ólýðræðislegum öflum. En það mun ekki koma í veg fyrir að við sinnum starfi okkar.“
Säpo segir að hinn ákærði sé miðaldra og sé mjög virkur í starfi Norrænu andspyrnuhreyfingarinnar. Öryggislögreglan hafði fylgst með honum um hríð. Skotvopnaleyfi hans rann út í maí. Hann skilaði ekki skotvopni sínu til lögreglunnar og því var húsleit gerð hjá honum. Þar fann lögreglan fjölda óskráðra skotvopna og mikið af skotfærum. Einnig fundust nasistarit, hermannabúningar og fánar merktir Norrænu andspyrnuhreyfingunni.
Sænska ríkisútvarpið segir að lögreglan vilji ekki láta mikið uppi um manninn eða blaðamennina tvo. Verjandi mannsins segir að hann neiti öllum ákæruatriðum. Málið verður tekið fyrir hjá dómi þann 23. ágúst.
Í leynilegri skýrslu frá Säpo kemur fram að félagar í Norrænu andspyrnuhreyfingunni, sem eru samtök nasista, smíði sín eigin vopn sem eru sögð vel úr garði gerð. Þetta vekur áhyggjur hjá Säpo. Lögreglumenn sem Sænska ríkistúvarpið ræddi við segja að það einkenni mörg þessara vopna að þau líti sakleysislega út.
Magnus Ranstorp, sem sérhæfir sig í rannsóknum á hryðjuverkum og kennir við sænska herskólann, segir að vopnin líti sakleysislega út og auðvelt sé að flytja þau, fela þau og nota. Þetta sýni að Norræna andspyrnuhreyfingin verði sífellt ofbeldisfyllri og þetta verði að ræða.
Lögreglan hefur fundið heimagerð vopn hjá nasistum í Sundsvall, Gautaborg og Stokkhólmi.