Fram kemur að fórnarlömbin hafi hugsanlega verið mun fleiri en erfitt sé að segja til um það því skýrslur hafi glatast og sum fórnarlambanna þora hugsanlega ekki að stíga fram og segja sögu sína. Í skýrslunni kemur fram að rúmlega 300 prestar hafi tekið þátt í barnaníðinu en aðeins tveir þeirra hafa verið ákærðir fyrir brotin. Annar þeirra játaði sök.
Flest málanna eru fyrnd þannig að ekki verður hægt að ákæra prestana. Margir þeirra eru dánir, hættir störfum eða hefur verið vikið úr embætti.
Barnaníðið er sagt hafa verið allt frá þukli og káfi til nauðgana og að flest fórnarlömbin ef ekki öll hafi verið strákar. Í einu máli var strákur látinn sitja fyrir nakinn eins og hann hefði verið krossfestur. Síðan tók hópur presta myndir af honum en þeir framleiddu og dreifðu barnaklámi.
Á fréttamannafundi sagði Josh Shapiro, ríkissaksóknari í Pennsylvania, að embættismenn kirkjunnar hafi oft vísað ásökunum um kynferðisbrot á bug eða hunsað þær. Þeir hafi kerfisbundið sagt að þetta ætti ekki við rök að styðjast og hafi gert lítið úr málunum. Þetta hafi þó ekki verið eitthvað til að gera lítið úr, hér hafi verið um barnaníð að ræða, þar á meðal nauðganir.
„Prestar nauðguðu litlum strákum og stelpum og guðsmenn sem báru ábyrgð á þeim gerðu ekki neitt. Þeir leyndu þessu öllu.“
Donald Wuerl, erkibiskup í Washington, er einn þeirra sem er sakaður um hylmingar í skýrslunni en hann var biskup í Pittsburgh frá 1988 til 2006. Hann vísar öllum ásökunum á bug og segist hafa reynt að stöðva ofbeldið.