Mikill sandstormur hefur geisað á Mars undanfarnar vikur og þegar verst lét huldi hann alla plánetuna. Í þessum mikla óveðri missti bandaríska geimferðastofnunin NASA samband við Marsbílinn Opportunity Rover og enn hefur ekki tekist að ná sambandi við hann. Vonir fólks hjá NASA um að samband náist aftur við hann eru nú farnar að dofna allverulega.

Opportunity hefur nú verið á Mars í 15 ár og hefur sent mikið magn upplýsinga um Rauðu plánetuna til jarðar. Eitt það athyglisverðasta við bílinn er að hann var hannaður til að endast í 90 daga á yfirborði Mars en ljóst má vera að höndunum hefur ekki verið kastað til við hönnun hans og smíði fyrst hann hefur enst í 15 ár.

Það var fyrir tveimur mánuðum að sambandið við Opportunity rofnaði og síðan hefur ekkert heyrst frá honum. Bíllinn er knúinn sólarorku og hætt er við að sandstormurinn hafi þakið sólarsellur hans ryki og sandi og því geti hann ekki hlaðið rafhlöður sínar.

Enn er ekki öll von úti um að bíllinn geti farið aftur í gang en eftir því sem tíminn líður minnkar voninn um að það gerist.