Vísindamenn þróuðu nýja tækni við útreikninga og gerð á veðurspám en hún kallast Procast (Probabilistic forecast) en með henni er reynt að hagræða ruglingslegri hegðun kerfa eins og veðurkerfa. Tæknin notar upplýsingar um fyrri breytingar á kerfum við útreikning á líkunum á breytingum í framtíðinni.
Samkvæmt spánni verða árin 2018 til 2022 mun hlýrri en vænta má vegna duttlunga í loftslagsbreytingunum sem hafa hægt á hnattrænni hlýnun á undanförnum árum. Vísindamennirnir komust að þeirri niðurstöðu að meðalhiti á landi og í sjó um allan heim verði mjög hár fram til 2022. Þetta hefur í för með sér auknar líkur á öfgafullu veðri.
Rétt er að hafa í huga að rannsóknin var gerð áður en hinir miklu hitar skullu á ýmsum svæðum heimsins í sumar. Rannsóknin hefur verið birt í vísindaritinu Nature Communications en þangað var henni skilað til birtingar í janúar.