Þrátt fyrir að mikil öryggisgæsla sé í kringum dönsku konungsfjölskylduna þá getur hún greinilega fengið óboðna gesti í heimsókn. Það gerðist um miðjan júlí þegar Friðrik krónprins og fjölskylda hans voru í sumarfríi í Gråsten höllinni á sunnanverðu Jótlandi.

Her&Nu skýrir frá þessu. Fram kemur að börn krónprinsparsins hafi verið að leik í hallargarðinum þegar prins Christian, sem er þriðji í erfðaröðinni að dönsku krúnunni, hafi tekið eftir tveimur óboðnum gestum í hallargarðinum. Hann gerði lífvörðum fjölskyldunnar strax viðvart. Óboðnu gestirnir voru strax handteknir en þarna reyndist vera um 29 ára karlmann og 28 ára konu að ræða.

Talskona lögreglunnar staðfesti þetta í samtali við Her&Nu.

Í fyrstu var ekki vitað hversu margir óboðnir gestir hefðu farið inn í hallargarðinn og var því mikil og nákvæm leit gerð í honum og höllinni.

Í ljós kom að fólkið var eitt á ferð og hafði ekki farið inn í hallargarðinn til að koma nærri hinum konungbornu heldur hafði fólkið ætlað stela kirsuberjum en nokkur kirsuberjatré eru í hallargarðinum.