Það reyndist ekki ferð til fjár hjá ónefndum manni sem hugðist stela bakpoka af ferðamanni á þriðjudaginn. Hann læddist að ferðamanninum og reyndi að taka bakpokann en ferðamaðurinn, sem er frá Bandaríkjunum, brást snarlega við og handsamaði þjófinn og batt hann við staur.

Þetta gerðist á þriðjudagskvöldið í miðborg Dyflinnar á Írlandi. Samkvæmt frétt Dublin Live þá fékk þjófurinn nokkur högg frá ferðamanninum sem sjónarvottar segja að sé „stór maður“ áður en hann var bundinn við staur. Nærstaddir skemmtu sér að sögn hið besta yfir þessum maklegu málagjöldum sem þjófurinn fékk.

Eftir að hafa bundið þjófinn við staurinn kallaði ferðamaðurinn snarráði á lögreglumann sem hann sá nærri og var þjófurinn handtekinn á meðan nærstaddir stóðu og hlógu að honum.