Ef sængurfötin eru ekki þvegin nógu oft þá verður rúmið fljótlega að einhverskonar bakteríu- og sveppagarði. Þetta segir Philip Tierno, örverufræðingur við New York háskóla. Örverurnar geta valdið veikindum hjá okkur því er nauðsynlegt að skipta reglulega um sængurfatnað.
Business Insider skýrir frá þessu. Þar kemur fram að Tierno segi að það þurfi að skipta á rúmunum einu sinni í viku. Niðurstöður rannsóknar frá 2017 styðja þetta en þær voru birtar í The Journal of Allergy and Clinical Immunology.
Mörg þúsund bandarísk heimili voru rannsökuð og var niðurstaðan að á rúmlega 90 prósent þeirra voru að minnsta kosti þrír ofnæmisvaldar. Þessir ofnæmisvaldar geta leynst í sængurfatnaði, þar sem nef og munnur fólks er nærri, og getur valdið nefrennsli og hnerrum. Tierno segir að fólk geti fengið ofnæmisviðbrögð þótt það sé ekki með ofnæmi.
Á einu ári myndar meðalmaðurinn um 100 lítra af svita á meðan hann liggur í rúminu. Þetta skapar kjöraðstæður fyrir örverur enda er heitt undir sængum og rakt. Á koddum geta allt að 16 sveppategundir komið sér fyrir og þrifist ágætlega.
En það er meira en bara sviti sem fer af okkur í rúmið og má þar nefna munnvatn og útferð frá endaþarmi. Allt getur þetta haft áhrif á heilsufar fólks.