Ashwaq Haji Hami, 19 ára, er af ættum Jasída en hryðjuverkasamtökin sem kenna sig við Íslamska ríkið (IS) myrtu mörg þúsund Jasída í Írak árið 2014. Hún hefur verið eitt helsta umfjöllunarefni þýskra fjölmiðla undanfarna daga eftir að hún flúði frá Þýskalandi til Írak eftir að hafa mætt liðsmanni IS tvisvar á götu úti í Þýskalandi.

Maðurinn heitir að hennar sögn Mohammed Rashid en er kallaður Abu Humam. Hann tók hana til fanga 2014 og pyntaði og misnotaði kynferðislega. Hami segist hafa snúið aftur heim af ótta við að rekast aftur á Rashid. Hún dvelur nú í flóttamannabúðum á yfirráðasvæði Kúrda í norðurhluta Írak.

Fram hefur komið í fjölmiðlum að þýsk yfirvöld hafi ekki verið reiðubúin til að aðstoða Hami og að henni hafi verið sagt að Rashid væri flóttamaður í Þýskalandi eins og hún. Talsmaður þýskra innflytjendayfirvalda sagði um helgina að rætt hafi verið við Hami en þær upplýsingar sem hún veitti yfirvöldum hafi ekki verið nægilega nákvæmar. Þegar yfirvöld hafi síðan ætlað að fylgja málinu betur eftir hafi Hami verið farin frá Þýskalandi.

Fréttamenn AP ræddu við hana í flóttamannabúðum í Írak. Hún sagði þeim að hún hafi verið tekin til fanga af hópi liðsmanna IS í ágúst 2014. Hún hafi verið gerð að þræl og misnotuð kynferðislega af fyrrgreindum Rashid.

Hún sagðist hafa rekist á hann í Þýskalandi 2016 og aftur nú í febrúar í Schwäbisch Gmünd í suðvesturhluta landsins. Hún sagðist ekki í minnsta vafa um að þetta hafi verið hann, hún muni alltaf þekkja andlit hans því hann hafi lamið hana svo oft.