Það var á föstudagskvöldið sem nágrannar hringdu í lögregluna eftir að þeir heyrðu öskur berast frá húsi í Mijas, sem er sunnan við Malaga. Þegar lögreglan kom á staðinn fann hún tvo menn sem höfðu báðir verið stungnir og skotnir.
Annar maðurinn var bundinn og lést á vettvangi en hinn var fluttur á sjúkrahús en hann er sagður vera í lífshættu. Diario Sur segir að svo virðist sem meintir gerendur hafi talið að maðurinn væri einnig látinn. Hann hafði lifað pyntingarnar af og náð að skríða út úr húsinu og biðja um hjálp.
Spænskir fjölmiðlar segja að málið tengist fíkniefnaviðskiptum.
Sevilla ABC hefur eftir lögreglumönnum sem komu á vettvang að hann hafi verið eins og „martröð“. Mennirnir höfðu verið bundnir fastir og voru með mörg opin sár. El Mundo segir að þeir hafi verið numdir á brott og pyntaðir.
Myndir frá vettvangi sýna blóðá gólfum og hlutum, blóðuga skóflu sem talið er að gerendurnir hafi notað og bönd sem talið er að mennirnir hafi verið bundnir með.
Snemma á laugardaginn voru þrír Svíar á þrítugsaldri handteknir eftir samvinnu spænsku og sænsku lögreglunnar. Þeir eru grunaðir um mannrán, morð, morðtilraun og frelsissviptingu. Þeir reyndu að flýja frá lögreglunni en með aðstoð sænsku lögreglunnar tókst að bera kennsl á þá og spænska lögreglan komst að hvaða bíl þeir óku. Þegar lögreglunni tókst að staðsetja bílinn reyndu þremenningarnir að flýja og komust í gegnum margar hindranir lögreglunnar. Mennirnir eru taldir hafa ætlað að komast yfir til Marokkó í Afríku. Það tókst þeim þó ekki því þeir voru handteknir nærri Gíbraltar.