Þetta eru meðal þeirra spurninga sem sækja á marga í Suður-Afríku í kjölfar útgáfu bókarinnar „The Lost Boys of Bird Island“. Annar höfunda bókarinnar, lögreglumaðurinn fyrrverandi Mark Minnie, fannst látinn átta dögum eftir útgáfu bókarinnar. Hann var með skotsár á höfði. Lögreglan segir að hann hafi tekið eigið líf en fjölskylda hans trúir því ekki og hefur ráðið færasta réttarmeinafræðing landsins til starfa.
Minnie komst í snertingu við málið á Fuglaeyju (Bird Island) fyrir rúmlega 30 árum þegar hann starfaði sem lögreglumaður. Rannsókn málsins var hætt snarlega að fyrirskipun saksóknara. Í framhaldinu fékk Minne ábendingu um að líf hans væri í hættu og hann sá sér þann kost vænstan að flýja land og flutti til Kína þar sem hann starfaði sem kennari. Hann kom þó nýlega aftur til Suður-Afríku til að fylgja bókinni úr hlaði en hann skrifaði hana ásamt blaðamanninum Chris Steyn.
Bókin er ekki fyrir viðkvæmar sálir en í henni er því haldið fram að hópur háttsettra stjórnmálamanna og kaupsýslumanna hafi starfrækt barnaníðingshring á Fuglaeyju. Þangað voru ungir, litaðir strákar fluttir og þeim síðan nauðgað og þeir misnotaðir kynferðislega á allan hugsanlega hátt. Fuglaeyja er utan við strönd Port Elizabeth. Magnus Malan, þáverandi varnarmálaráðherra, er sagður hafa verið leiðtogi níðinganna.
Strákarnir voru fluttir með þyrlum til eyjunnar en herinn fór með yfirráð á henni. Auk Malan voru tveir aðrir ráðherrar úr Þjóðernisflokknum viðriðnir ofeldið auk fjölda kaupsýslumanna. Opinberlega var sagt að þeir væru í veiðiferð á eyjunni, sem var náttúruverndarsvæði, en samkvæmt því sem kemur fram í bókinni helltu þeir strákana fulla og brutu síðan gegn þeim.
Í bókinni er meðal annars sagt frá strák, sem var fluttur til eyjunnar, skammbyssu var stungið upp í endaþarm hans og Malan tók í gikkinn. Strákurinn særðist illa og var fluttur með þyrlu á sjúkrahús í Port Elizabeth. Sjúkrahúsið var eingöngu ætlað hvítu fólki enda var aðskilnaðarstefnan í hámarki á þessum tíma. Strákurinn var lagður þar inn og verðir voru settir við stofu hans. Foreldrum hans og starfsfólki á sjúkrahúsinu var síðan greitt fyrir að þegja um málið
Minnie heyrði af misnotkuninni 1987 en það var kaupsýslumaðurinn Dave Allen sem skýrði honum frá henni. Hann hafði þá verið handtekinn fyrir vörslu barnakláms og kynferðislegt ofbeldi gegn ungun drengjum, málið var þó ekki tengt Fuglaeyju. Við yfirheyrslu kom ýmislegt fram um það sem fram fór á Fuglaeyju. Hann nefndi meðal annars til sögunnar fyrrnefndar Magnus Malan og John Wiley sem var umhverfisráðherra. Hann nefndi einnig þriðja ráðherrann til sögunnar.
En það vildi svo til að áður en færa átti Allen fyrir dómara lést hann af völdum skotsárs á höfði. Viku síðar var röðin komin að Wiley að látast af völdum skots í höfuðið. Lögreglan komst að þeirri niðurstöðu að þeir hefðu báðir framið sjálfsvíg. Það vekur auðvitað athygli að Minnie lést einnig af völdum skots í höfuðið.
Magnus Malan lést 2011. Fjölskyldan hans vísar öllum ásökunum á hendur honum á bug og sumir fjölmiðlar og stjórnmálamenn hafa velt vöngum yfir hvernig barnaníð sem þetta hafi getað viðgengist.
Aðrir rifja upp hvernig ástandið var í Suður-Afríku á miðjum níunda áratugnum. Þá stýrðu gamlir, hvítir og kristnir menn landinu og notuðu biblíuna til að réttlæta kynþáttahyggju. Þeir voru sannfærðir um að með aðskilnaðarstefnunni gætu þeir varið trú sína, fjölskyldur, land og ríki gegn „trúlausum kommúnistum“ og „ósiðmenntuðum svertingjum“.
Suður-Afríka sætti mikilli einangrun á þessum tíma af hálfu alþjóðasamfélagsins. Malan hafði byggt upp sterkan her og lögreglu og var með góða stjórn á leyniþjónustunni. Síðar kom í ljós að her, lögreglan og leyniþjónusta höfðu haft nokkuð frjálsar hendur með pyntingar á tímum aðskilnaðarstefnunar sem og að láta „óæskilegt“ fólk hverfa.
Fjölskylda og vinir Mark Minnie og útgefandi bókarinnar telja að hann hafi ekki tekið eigið líf og að andlát hans á þessum tímapunkti bendi til að hann hafi verið myrtur. Þetta hefur vakið upp ótta um að enn sé að störfum leynileg stofnun eða samtök sem hylmir yfir leyndarmál frá tímum aðskilnaðarstefnunnar.
Þriðja ráðherrann, sem Allen nefndi til sögunnar, hefur ekki verið nafngreindur en hann er að sögn enn á lífi. Auk hans hljóta fleiri að hafa vitað um óhugnaðinn sem fór fram á Fuglaeyju.
Byggt á umfjöllun Times Live, Herald Live, BBC og fleiri fjölmiðla.