Samkvæmt niðurstöðum rannsóknar sem miðstöð vímuefnarannsókna (Center for Rusmiddelforskning) í Danmörku gerði fyrir Danska ríkisútvarpið er þetta staðreynd. Þetta er í fyrsta sinn sem rannsókn sem þessi er gerð þar sem afbrot hassneytenda eru rannsökuð. Samkvæmt niðurstöðunum eru hassneytendur sjö sinnum oftar dæmdir fyrir innbrot en „hinn venjulegi borgari“ og níu sinnum oftar fyrir ofbeldi.
Við rannsóknina voru tveir gagnagrunnar samkeyrðir. Gagnagrunnur um hassneytendur og sakaskráin en þar eru allir dómar fyrir afbrot í Danmörku skráðir. Hassneytendur eru skilgreindir sem þeir sem reykja hass daglega eða næstum daglega.
Síðan var unnið út frá tveimur hópum. Annar var hópur hassneytenda en í honum voru 10.000 manns sem hafa komið við sögu yfirvalda vegna hassneyslu sem er þá talin vera stærsta vandamál þeirra. Í samanburðarhópnum voru 100.000 venjulegir Danir á sama aldri og þeir sem eru í hasshópnum og kynjahlutföllin voru þau sömu.
Rannsakað var hversu oft fólk kom við sögu í eftirfarandi málaflokkum: Innbrot og þjófnaður, ofbeldisbrot, varsla fíkniefna, umferðarlagabrot, vopnalög og fíkniefnasala. Auk þess var rannsakað hversu oft og hve lengi fólk sat í fangelsi. Hassneytendurnir skáru sig úr í öllum flokkunum og höfðu fengið miklu fleiri dóma en fólkið í samanburðarhópnum.
Það bera að hafa í huga að hass er ólöglegt fíkniefni í Danmörku og því þurfa notendur þess að vera í tengslum við afbrotamenn til að verða sér úti um efnið. Það gerir að verkum að auknar líkur eru á að neytendurnir sogist inn í heim afbrotamanna.
