„Jafnvel þótt ég segi sannleikann þá gerir það mig að lygara. Það gengur ekki.“
Sagði Trump meðal annars í gær í viðtali við Reuters.
Trump er því samstíga lögmanni sínum Rudy Giuliani, fyrrum borgarstjóra í New York. Hann varaði Trump við því um helgina að tjá sig eiðsvarinn vegna hættu á að hann „gengi í gildru og fremdi meinsæri“.
Trump sagðist óttast að verða ákærður fyrir meinsæri ef framburður hans er ekki samhljóða framburði annarra vitna og þá ekki síst framburð James Comey.
„Ef ég segi eitthvað og hann (James Comey, innskot blaðamanns) segir eitthvað þá eru það mín orð gegn hans. Hann er góður vinur Mueller og þá mun Mueller kannski segja: Ég trúi Comey.“
Sagði forsetinn í gær. Hann vildi ekki svara spurningu um hvort hann muni á endanum mæta til yfirheyrslu hjá Mueller eða hvort hann íhugaði að svipta Mueller öryggisviðurkenningu sem veitir honum aðgang að trúnaðarupplýsingum á grundvelli þess að hann var áður yfirmaður alríkislögreglunnar FBI. Trump svipti John Brennan, fyrrum yfirmann CIA, þessari öryggisviðurkenningu í síðustu viku en Brennan hefur gagnrýnt forsetann opinberlega fyrir stefnu hans í utanríkis- og öryggismálum.
