Þegar Adam Howells gleymdi veskinu sínu í lest járnbrautarfyrirtækisins Arriva Trains Wales átti hann ekki von á öðru en að starfsfólk fyrirtækisins myndi afhenda honum það aftur með glöðu geði.
Annað kom þó á daginn.
Þegar Adam kom og sótti veskið var hann rukkaður um tvö pund, um 300 krónur, og auk þess var honum gert að greiða tíu prósent af þeim peningum sem voru í veskinu til fyrirtækisins.
Eins og gefur að skilja er Adam ekki sáttur við þessi vinnubrögð og vakti hann athygli á málinu á Twitter. Fyrirtækið benti honum á að þetta væri viðtekin venja, mismunandi upphæð væri rukkuð fyrir mismunandi hluti. Þannig rukkar fyrirtækið þá sem gleyma göngustöfum í lestunum þrjú pund, tæpar fimm hundruð krónur. Þeir sem gleyma farsímum geta vænst þess að þurfa að greiða 10 pund, 1.500 krónur.
Fjörugar umræður hafa verið um þetta fyrirkomulag lestarfyrirtækisins á Twitter og sitt sýnist hverjum. Tom Siddle, íbúi í Wales, segir að líkja megi vinnubrögðunum við mafíustarfsemi. „Fyrir það fyrsta er þjónusta fyrirtækisins ekkert sérstök en að dirfast að rukka einhvern um það sem er í veski viðkomandi á hverjum tíma er bara tækifærismennska. Þetta er dæmigerð mafíustarfsemi.“
Talsmaður fyrirtækisins segir að fyrirtækið fái á hverju ári í hendurnar þúsundir hluta sem gleymast í lestunum. Fyrirtækið þurfi að halda skrá yfir þessa hluti og það kosti að geyma þá.