Um síðustu helgi var brotist inn í einbýlishús í Gentofte í Kaupmannahöfn og þaðan stolið miklum menningarverðmætum í formi glæsilegra silfurmuna. Munirnir eru metnir á allt að 10 milljónir danskra króna eða sem svarar til rúmlega 170 milljóna íslenskra króna. Eigandi þeirra hefur heitið 3 milljónum danskra króna, sem svarar til um 50 milljóna íslenskra króna, í verðlaun fyrir upplýsingar sem verða til þess að munirnir finnast.

Þjófunum tókst að komast framhjá þjófavarnarkerfi í húsinu með því að fara inn á aðra hæð þess með því að klifra upp stiga. Stiginn var skilinn eftir á vettvangi og hefur lögreglan birt myndir af honum og vonast til að eigandi hans gefi sig fram svo hægt sé að kortleggja hvar hann var tekinn. Eins og sjá má á myndinni fyrir neðan er stiginn „merktur“ með þremur svörtum blettum og vonast lögreglan að það verði til að eigandi hans átti sig á hvar stiginn er núna.

Silfurmunirnir eru taldir vera mikil menningarverðmæti en þeir eru frá sautjándu og átjándu öld. Um er að ræða kertastjaka, súpuskálar og fleira. Ekki verður auðvelt að koma hlutunum í verð því þeir falla undir lög um danskan menningararf og geta uppboðshús ekki selt þá.