Karlmaður á sextugsaldri lá á sjúkrahúsinu í Lillehammer í Noregi í vikunni. Aðfaranótt miðvikudags var nánustu ættingjum hans tilkynnt að hann væri látinn. En maðurinn var alls ekki látinn og var bara við ágætis heilsu.

Þegar leið á miðvikudagsmorguninn fékk fjölskyldan aftur tilkynningu frá sjúkrahúsinu og nú um að maðurinn væri lifandi og væri bara að drekka kaffi.

Í samtali við TV2 sagði Ole Jonas Rolstad, yfirlæknir á lyflækningadeild sjúkrahússins, að þar á bæ hafi verið gerð alvarleg mistök og biðjist sjúkrahúsið innilegrar afsökunar á þeim. Hann sagði að starfsfólk hafi ruglað manninum saman við annan sjúkling sem lést þessa sömu nótt. Mennirnir voru að hans sögn næstum alnafnar.

Ættingi mannsins sagði að fjölskyldunni hafi brugðið mikið við dánarfregnina enda hafi maðurinn ekki verið alvarlega veikur.