Á mörgum svæðum í Suður-Afríku hefur lögreglan misst alla stjórn á ástandinu og morðtíðnin er skelfileg. Lögreglumálaráðherrann segir að það vanti 62.000 lögreglumenn til starfa í landinu. Að meðaltali voru 56 manns myrtir á degi hverjum í landinu frá mars 2017 til og með mars 2018. Embættismenn segja að morðtíðnin hafi hækkað um 30 prósent á undanförnum sex árum.

Flest morðanna eru framin í Western-Cape héraðinu þar sem Cape Town (Höfðaborg) er og í Gauteng héraðinu þar sem höfuðborgin Pretoria er sem og stærsta borg landsins, Jóhannesarborg. Flest morðin eru framin í fátækum úthverfum borganna þar sem margir svartir og litaðir búa við bág kjör. Ójöfnuður í landinu er meiri í dag en hann var þegar Nelson Mandela tók við forsetaembættinu 1994, fyrstur svarta manna.

Bheki Cele, lögreglumálaráðherra, segir að líkja megi ástandinu við að Suður-Afríka sé stríðssvæði þrátt fyrir að friður ríki. Hann sagði að það vanti um 62.000 lögreglumenn til starfa. Landið uppfylli ekki lengur viðmið Sameinuðu þjóðanna um styrk lögreglunnar en samkvæmt viðmiðunum á að vera einn lögreglumaður fyrir hverja 220 íbúa.

Flest morðanna eru framin á svokölluðum „no-go“ svæðum en það eru svæði sem lögreglan hefur enga stjórn á og glæpagengi stýra. Lögreglan hættir sér ekki inn á þessi svæði og þar ríkir því algjör lögleysa.