Íbúar í úthverfi Guadalajara í Mexíkó kvörtuðu til yfirvalda á dögunum vegna óþefjar sem lagði frá flutningabíl skammt frá. Í ljós kom að í flutningabílnum voru lík um það bil hundrað einstaklinga.

Reglulega hefur verið fjallað um illvirki eiturlyfjagengja í Mexíkó en annað var þó uppi á teningnum í þessu tiltekna tilviki. Staðreyndin er engu að síður sú að grafreitir og líkhús borgarinnar hafa verið yfir sig full að undanförnu, meðal annars vegna ofbeldisöldu þar sem fjölmargir hafa verið myrtir.

Þess vegna, að sögn Guardian, var brugðið á það ráð að koma líkunum fyrir í flutningabíl. Þetta fór fyrir brjóstið á mörgum íbúum sem kvörtuðu undan flugum og miklum óþef frá bílnum. „Það eru mörg börn í þessu hverfi og við gætum öll orðið veik,“ segir José Luis Tovar, íbúi í hverfinu.

Bíllinn hefur nú verið fluttur annað, í iðnaðarhverfi skammt frá.