Rússnesku bifhjólasamtökin Næturúlfarnir hafa nú opnað höfuðstöðvar samtakanna í Slóvakíu en þær eiga að vera einhverskonar evrópskar höfuðstöðvar samtakanna. Meðlimir samtakanna eru ekki saklausir áhugamenn um bifhjól því þeir hafa komið víða við í vafasömum aðgerðum á vegum rússneskra stjórnvalda. Má þar nefna innlimun Krím í Rússland. Vladimir Pútín, forseti Rússlands, hefur margoft hlaðið þau lofi. En þeir sem eru ekki eins hrifnir af samtökunum segja að þau séu leyniher Pútíns sem sé notaður til að skapa ójafnvægi á svæðum sem Rússar vilja sýna áhrif sín. Samtökin vegsama Stalín og eru í góðum tengslum við rússnesku rétttrúnaðarkirkjuna.

Nýju höfuðstöðvarnar eru nærri Bratislava, í þorpi um 60 km frá höfuðborginni, á svæði þar sem landamæri Slóvakíu, Tékklands og Austurríkis eru. Húsið er nýuppgert, málað í herlitum og umgirt með tveggja metra vegg með gaddavír efst. Innan girðingarinnar eru ýmis hertól.

Radio Free Europe/Radio Liberty, sem er fjármagnað af bandarískum stjórnvöldum, skýrir frá þessu. Blaðamenn miðilsins hafa tekið myndir úr lofti af höfuðstöðvunum og hafa því getað sagt hvað er bak við múrinn góða.

Næturúlfarnir segja sjálfir að þeir ætli bara að opna safn í Slóvakíu til að dásama Rauða herinn. Hertólin við húsið eru gömul en eru í eigu varnarmálaráðuneytisins. Þar hefur einn yfirmaður verið látinn taka pokann sinn fyrir að leigja Næturúlfunum hertólin.

Slóvakar eru ekki hrifnir af samtökunum enda muna margir landsmenn eftir innrás Sovétmanna í Tékkóslóvakíu 1969 en Slóvakía var þá hluti af Tékkóslóvakíu. Andrej Kiska, forseti landsins, sagði nýlega að Næturúlfarnir væru „alvarleg öryggisógn“. Leiðtogi Næturúlfanna, Alexander Zaldostanov, svaraði forsetanum fljótlega á heimasíðu Úlfanna og sagði að forsetinn ætti að hafa í huga að það hafi verið Slóvakar sem opnuðu höfuðstöðvarnar en ekki Rússar og að þetta hafi ekki verið gert að frumkvæði Rússa. Frumkvæðið hafi komið frá evrópskum borgurum sem leiti sannleikans og hafi fundið hann hjá Næturúlfunum.