Borgen mun halda áfram að starfa fyrir bankann þar til eftirmaður hans hefur verið fundinn. Í tilkynningu frá Danske Bank er haft eftir Borgen að þrátt fyrir að niðurstaða óháðrar lögmannsstofu sé að hann hafi uppfyllt skyldur þær sem eru lagðar á hann lögum samkvæmt telji hann best að stíga til hliðar. Skýrsla lögmannsstofunnar verður birt síðar í dag.
Samkvæmt því sem hefur komið fram í dönskum, breskum og bandarískum fjölmiðlum undanfarið virðist útibú Danske Bank í Eistlandi hafa verið notað til mikilla fjármagnsflutninga frá 2007 til 2015 og ekki sé annað að sjá en að stórfellt peningaþvætti hafi átt sér stað í útibúinu.
Wall Street Journal skýrði nýlega frá því að um 3.000 erlendir viðskiptavinir útibúsins hafi flutt um 960 milljarða danskra króna í gegnum það á þessu tíma. Áður hafði Berlingske skýrt frá því að 53 milljarðar danskra króna hafi verið fluttir í gegnum útibúið og leiki grunur á að þar hafi verið um peningaþvætti að ræða. Margir þessara 3.000 viðskiptavina eru Rússar og fólk sem þykir vafasamt af ýmsum ástæðum.
Málið er nú til rannsóknar hjá dönskum, eistneskum og bandarískum yfirvöldum. Ef grunsemdir manna um peningaþvætti reynast á rökum reistar á bankinn háar sektir yfir höfði sér. Sektir sem nema tugum milljarða íslenskra króna.
