Moon Jae-in, forseti Suður-Kóreu, og Kim Jong-un, einræðisherra í Norður-Kóreu, tilkynntu þetta á fréttamannafundi í nótt. Kim Jong-un sagði við það tækifæri að þetta væri eitt skref fram á við í átt að friði á Kóreuskaga. Moon Jae-in sagði að Norður-Kórea muni taka ákveðin skref í átt að kjarnorkuafvopnun þegar hann ræddi hvað leiðtogarnir hefðu rætt um á fundi sínum. Hann sagði að Kim Jong-un hafi samþykkt að loka tilraunastöð fyrir eldflaugar og leyfa alþjóðlegum sérfræðingum að vera viðstöddum.
Leiðtogarnir náðu samkomulagi um að fjarlægja allar hættur sem geta valdið stríði á skaganum að sögn Moon og hann sagði að ekki væri svo langt í algjöra kjarnorkuafvopnun. AP segir að Kim hafi gert þá kröfu að Bandaríkin taki samskonar skref ef Norður-Kórea eigi að loka stærstu kjarnorkutilraunastöð landsins.
Leiðtogarnir ákváðu að setja sameiginlega hernaðarnefnd á laggirnar sem á að skoða hvernig er hægt að draga úr spennunni á milli ríkjanna.
Leiðtogarnir ákváðu að koma upp einhverskonar „stuðpúðasvæði“ á milli ríkjanna til að draga úr hættunni á átökum. Þá á að leggja 11 landamæragæslustöðvar af á næstu tveimur mánuðum og lokamarkmiðið er að fjarlægja allar slíkar stöðvar. Einnig var ákveðið að tengja járnbrautarlestarkerfi ríkjanna til að fjölskyldur, sem eru aðskildar í ríkjunum tveimur, geti hist á nýjan leik. Þá ætla ríkin að vinna saman að heilsugæsluverkefnum.
En ekki síst ætla þau í sameiningu að sækja um að fá að halda sumarólympíuleikana 2032.
