Heimildarmynd um skelfileg örlög hins fjórtán ára Breck Bednar verður sýnd í barnaskólum í Bretlandi til að vekja athygli á þeim hættum sem kunna að leynast á netinu.
Breck var myrtur árið 2014 eftir að hafa kynnst manni á netinu. Pilturinn sagði foreldrum sínum kvöldið örlagaríka að hann væri að fara gista hjá vini sínum þegar raunin var sú að hann var að fara hitta væntanlegan morðingja sinn, Lewis Daynes sem var 18 ára á þessum tíma.
Breck og Lewis höfðu kynnst í gegnum tölvuleik sem þeir spiluðu á netinu. Talið er að Daynes, sem var dæmdur í lífstíðarfangelsi árið 2015, hafi skipulagt morðið vandlega áður en hann lét til skarar skríða. Áður en hann stakk hann til bana braut hann kynferðislega á Breck.
Móðir fórnarlambsins, Lorin LaFave, kemur meðal annars fram í myndinni sem heitir Breck’s Last Game.
Í myndinni segir Lorin að hætturnar leynist víða á netinu. :arna hafi eldri drengur, fyrirmynd í augum Brecks, sett sig í samband við hann og lokkað hann í gildru. Myndin verður sýnd næsta vor og er um að ræða samvinnuverkefni skólayfirvalda og lögreglu.
