Minnisblaðið er leynilegt en Sky News hefur komist yfir það. Ef ekki tekst að semja um málið munu að minnsta kosti sex milljónir flugfarþega, sem fljúga frá Bretlandi og þurfa að skipta um flugvél innan ESB, þurfa að fara í gegnum auka öryggiseftirlit á flugvöllum.
Í minnisblaðinu kemur fram að evrópskir flugvellir séu ekki í stakk búnir til að takast á við þetta og það muni hafa í för með sér „miklar truflanir og aukna hættu á öryggisvandamálum“.
„Flugvellirnir verða að kaupa meiri öryggisbúnað, reisa nýjar eftirlitsstöðvar, ráða fleira starfsfólk með tilheyrandi kostnaði fyrir flugvellina, flugfélögin og á endanum farþegana.“
Segir meðal annars í minnisblaðinu.
Reiknað er með að nauðsynlegar breytingar taki allt að níu mánuði og af þeim sökum biðja flugvellirnir um að Bretar fái að vera áfram aðilar að núverandi fyrirkomulagi þar sem hægt er að skipta um flugvél án þess að fara aftur í gegnum öryggisleit.
Verst verður ástandið á Schiphol í Amsterdam en þar skipta 2,5 milljónir farþega frá Bretlandi um flugvélar á ári. Í Frankfurt eru það 1,4 milljónir farþega frá Bretlandi sem skipta um flugvélar á ári. Rúmlega ein milljón í Barcelona og Madrid. Í fimmta sæti er síðan Keflavíkurflugvöllur með 326.355 farþega frá Bretlandi sem skipta um flugvélar árlega.
Flugvellirnir spá því að ef ekki verði brugðist við þá muni þjónustan versna, seinkanir verði fleiri og nái til allra farþega sem fara um vellina.
