Það hamlar ekki áhuga og vilja þjófa til að verða sér úti um verðmæti að rafmynt er langt frá því að vera áþreifanleg. Þeir láta það ekki stöðva sig og finna hugvitsamlegar leiðir til að stela rafmynt. Kannski ekki ólíkt bankaránum upp á gamla mátan nema hvað nú sitja þjófarnir við tölvu og stela verðmætunum.

Nú er japanska lögreglan að rannsaka þjófnað á miklum verðmætu frá rafmyntamarkaði þar í landi. Verðmæti rafmyntarinnar er sem nemur um 6,8 milljörðum íslenskra króna.

Það var í síðustu viku sem tölvuþrjótar brutust inn í tölvukerfi Tech Bureau Corporation og athöfnuðu sig þar í tvær klukkustundir og höfðu þessi miklu verðmæti á brott með sér en rafmyntin var í vörslu Zaif-markaðarins.

Japanir hafa tekið rafmynt vel og hafa búið til kerfi sem eiga að vernda viðskiptavinina fyrir þjófnuðum sem þessum. Kerfin áttu að sýna og sanna að Japan væri leiðandi ríki á þessu sviði en svo er nú að sjá að þrjótunum hafi tekist að sjá við þessu öllu saman.