Lögreglurannsókn, sem hlaut nafnið Operation Takahe, er nú lokið hjá Lundúnalögreglunni. Rannsóknin snerist um dráp á um 400 köttum og fjölda kanína. Drápin hófust í Croydon en breiddust síðan út og teygðu sig víða um þessa stóru borg. Verðlaunum var heitið fyrir upplýsingar sem gætu leitt til þess að gerandinn fyndist en margir töldu að hér væri einhver á ferð sem hefði unun af að drepa ketti og jafnvel pynta þá. Á mörgum kattanna voru merki líkt því að skorið hefði verið í þá og því grunaði marga hið versta.

Lögreglan hóf rannsókn á málinu fyrir tveimur árum og beindust sjónir hennar í upphafi að því að finna þann eða þá sem bæru ábyrgð á þessum drápum. Í upphafi var meira að segja ekki talið ólíklegt að gerandinn væri rekinn áfram af brengluðum kynferðislegum hvötum. Nú er rannsókninni sem sagt lokið án þess að nokkur hafi verið handtekinn.

Upptökur úr eftirlitsmyndavélum og DNA-rannsóknir hafa leitt sannleikann um kattadrápin í ljós. Sökudólgurinn eða öllu heldur sökudólgarnir eru refir. The Guardian skýrir frá þessu. Mikið er af refum víða í Lundúnum og þar sem þeir eru rándýr eru kettir og kanínur eins og hver önnur bráð í þeirra augum og skiptir þá engu máli þótt um gæludýr sé að ræða. Stóra kattadrápsmálið er því leyst.