Þetta sagði 16 ára stúlka fyrir dómi í gær þegar málið var tekið fyrir hjá undirrétti í Kaupmannahöfn. 41 árs kona er ákærð fyrir að hafa ekki komið piltinum til bjargar sem og 14 ára dóttur sinni sem hafði einnig tekið inn töflur. Konan er sögð hafa vitað að þau höfðu þörf fyrir hjálp en hafi samt sem áður ekki aðhafst neitt. Þetta átti sér stað á heimili konunnar. Hún neitar sök.
Pilturinn lést af völdum eiturlyfjanna en stúlkan lifði af en varð fyrir heilaskaða. Við krufningu kom í ljós að milta piltsins hafði skaddast sem orsakaði miklar innri blæðingar. Einnig var hann með alvarlega metadon eitrun.
Fyrrnefnt vitni sagði fyrir dómi að hún vissi ekki hversu langur tími leið frá því að fólk áttaði sig á að pilturinn þarfnaðist hjálpar þar til hann fékk hana en sagði að hennar upplifun hafi verið að þetta „hafi gerst hratt“.
Ekstra Bladet skýrir frá þessu. Vitnið kom í íbúðina um klukkan 21. Þá lá pilturinn inni á baðherbergi. Hann var búinn að kasta upp og var þakinn ælu. Hann svaf að mestu. Vitnið sagði að margir hafi kíkt inn til hans en látið hann liggja áfram á gólfinu. Eitt sinn sagði pilturinn að hann hefði enga tilfinningu í fótunum.
Í svefnherbergi móðurinnar svaf 14 ára stúlkan. Vitnið sagðist hafa talið að hún andaði ekki eðlilega og því hafi hún hagrætt höfði hennar til að opna öndunarveginn.
Um klukkan 22 komu lögreglumenn í íbúðina til að sækja annan pilt sem var þar en foreldrar hans höfðu beðið lögregluna um það. Enginn viðstaddra sagði lögreglumönnunum frá piltinum sem lá rænulaus inni á baði. Vitnið sagði í gær að fólk hafi óttast að pilturinn myndi þá lenda í vanda.
Eftir það versnaði ástand piltsins að sögn vitnisins sem tók eftir því að pilturinn hafði misst stjórn á þvagblöðrunni og hafði pissað í buxurnar. Hann varð sífellt fölari. Annar piltur, sem var til staðar, sagði í sífellu að hann teldi að pilturinn væri dáinn. Hin ákærða kannaði þá púls hjá piltinum og fann veikan púls. Vitnið sagði að ýtt hafi verið við piltinum og sparkað í hann til að reyna að fá viðbrögð hjá honum. Einnig ýtti einn viðstaddra við honum með kústskafti því hann vildi ekki snerta meðvitundarlausan piltinn sem var „útataður í ælu og þvagi“.
En allt kom fyrir ekkert og pilturinn sýndi engin viðbrögð. Á endanum báru þrír 14 ára piltar hann út úr íbúðinni og út á götu og hringdu í 112. Ætlunin var að segja að þeir hefðu fundið piltinn úti á götu.
„Hún (hin ákærða) vildi ekki fá sjúkraflutningamenn og lögreglu inn í íbúðina.“
Sagði vitnið sem var inni í íbúðinn og fylgdist með út um glugga þegar sjúkrabílar og lögregla komu um klukkan hálf tvö um nóttina. Rétt fyrir klukkan þrjú fundu lögreglumenn dóttur hinnar ákærðu í svefnherberginu en þá var búið að úrskurða piltinn látinn.