Repúblikönum er mikið í mun að koma Kavanaugh í embætti hæstaréttardómara en hann þykir mjög íhaldssamur og myndi tryggja íhaldsöflunum meirihluta í hæstarétti og það hugsanlega næstu áratugina. En demókratar eru ekki eins æstir í að fá Kavanaugh í hæstarétt enda samræmast sjónarmið hans ekki sjónarmiðum þeirra í flestum málum. Hann er tildæmis hlynntur frjálslyndri skotvopnalöggjöf og banni við fóstureyðingum.
Repúblikanar eru með 51 þingmann í öldungadeildinni en demókratar 49. Í þessu máli hafa tveir repúblikanar gengið til liðs við demókrata og krafist nánari rannsóknar á ásökunum Ford á hendur Kavanaugh. Í fyrstu lýsti Ford sig reiðubúna til að mæta fyrir nefnd öldungardeildarþingmanna og bera vitni um málið. Síðan dró hún í land með það og vildi að alríkislögreglan FBI rannsakaði málið áður en nú er hún aftur reiðubúin til að mæta fyrir nefndina að sögn lögmanns hennar. Lögmaður hennar segir að hún sé reiðubúin til að bera vitni ef nefndin bjóði hennar sanngjarna skilmála og tryggi öryggi hennar en Ford hafa borist líflátshótanir eftir að hún skýrði frá málinu í samtali við Washington Post.
Repúblikanar í öldungadeildinni hafa krafist þess að Ford mæti fyrir þingnefndina á mánudaginn en lögmaður hennar segir það ekki mögulegt.
Eins og fyrr sagði er repúblikönum mikið í mun að koma Kavanaugh í embætti hæstaréttardómara og það áður en kosið verður til þings í byrjun nóvember. Trúarleiðtogar og andstæðingar fóstureyðinga óttast að mjög íhaldssamir kjósendur muni ekki mæta á kjörstað ef ekki tekst að koma útnefningu Kavanaugh í gegnum þingið áður.
