Samkvæmt heimildum bandarískra leyniþjónustustofnana eru Rússar að vinna að þróun og smíði nýrrar tegundar kafbáta sem á að taka í notkun 2024. Kafbátategundin nefnist Borei II og er fjórða kynslóð kjarnorkuknúinna kafbáta. Þeir verða vopnaðir langdrægum eldflaugum sem geta flogið á fimmföldum hljóðhraða.

CNBC skýrir frá þessu. Fram kemur að til að fjármagna smíði átta kafbáta af þessari tegund hafi fé verið tekið úr öðrum verkefnum hersins. Hver þessara kafbáta mun geta borið 20 langdrægar eldflaugar, sem nefnast Bulava, en hver þeirra getur borið 100 til 150 kílótonna kjarnorkusprengjur en það eru 10 sinnum öflugri sprengjur en varpað var á Hiroshima í síðari heimsstyrjöldinni.

Eldflaugarnar geta náð allt að fimmföldum hljóðhraða.

Bandaríkin eiga ekki kafbáta né eldflaugar sem jafnast á við þetta og því virðast Rússar vera að ná yfirburðum á þessu sviði.