Eftir margra mánaða þurrka skall öflugt óveður á Þýskalandi síðdegis í gær. Mikil vandræði hlutust í umferðinni af völdum veðursins og margar byggingar urðu fyrir skemmdum í suður- og vesturhlutum landsins. 78 ára kona lést í Bamberg eftir að tré féll á tjaldsvæði þar sem hún var gestur. Í Epfenbach féll tré á bíl með fjórum innanborðs. Fjögurra ára drengur slasaðist alvarlega en þrír aðrir úr fjölskyldu hans sluppu án líkamlegra meiðsla.
Fjölda flugferða var aflýst á flugvellinum í Frankfurt og seinkun varð á öðrum flugferðum. Fjölda lestarferða var aflýst. Margir vegir í suðurhluta landsins eru lokaðir þar sem of hættulegt er talið að aka eftir þeim þessa stundina vegna rigningar og fjölda trjágreina sem liggja á þeim.
