Svikastarfsemi sem þessi er umfangsmikil á heimsvísu og hefur náð hingað til lands. Ekki hefur verið gerð nein samantekt á umfanginu hér á landi en í Bretlandi er talið að með aðferðum sem þessum hafi þrjótar náð að svíkja sem nemur um þremur milljörðum íslenskra króna út úr fólki á síðasta ári og hafi fórnarlömbin verið um 22.000 talsins.
Lundúnalögreglan hefur því hleypt nýrri herferð af stað til að upplýsa fólk um hættuna sem stafar af tölvuþrjótum sem þessum og upplýsa fólk um aðferðir þeirra.
Eins og fyrr sagði eru símtöl, tölvupóstar eða sprettigluggi með skilaboðum vinsælar leiðir þrjótanna til að ná til fólks. Þá er reynt að telja fólki trú um að eitthvað sé að tölvunni þeirra eða nettengingunni og þetta þurfi að laga. Þrjótarnir krefjast greiðslu fyrir að laga þetta eða blekkja fólk til að hlaða niður forritum sem veita þeim aðgang að persónulegum upplýsingum eins og fjármálum viðkomandi.
Í tengslum við herferðina hafa verið birt góð ráð og upplýsingar sem tengjast svikastarfsemi sem þessari.
Tölvufyrirtæki hringja ekki í þig óumbeðið til að bjóða aðstoð við að laga tölvuna þína. Svikahrappar gera það hins vegar til að reyna að stela frá þér og skemma tölvuna þína með spilliforritum. Taktu öllum slíkum símtölum með fyrirvara og ekki veita neinar persónulegar upplýsingar.
Tölvufyrirtæki senda að jafnaði ekki frá sér óumbeðin skilaboð um öryggisuppfærslur en þau senda uppfærslur á öryggisforritum frá sér. Ef þú ert í vafa, ekki opna tölvupóstinn, ekki ýta á tengla eða hlaða viðhengjum niður.
Tölvufyrirtæki biðja ekki um kreditkortaupplýsingar til að virkja hugbúnað. Þau biðja heldur ekki um persónugreinanlegar upplýsingar, þar á meðal greiðslukortaupplýsingar.