Skurðlæknirinn Grant Robicheaux, 38 ára, og unnusta hans Cerissa Riley, 31 árs, hafa verið handtekin og ákærð fyrir að hafa deyft konur og misnotað þær kynferðislega. Enn sem komið er hafa þau „aðeins“ verið ákærð fyrir brot gegn tveimur konum en saksóknari í Orange County segir að hugsanlega muni talan hækka og að fórnarlömbin geti verið mörg hundruð.
Lögreglan hefur fundið mörg hundruð, hugsanlega fleiri en eitt þúsund, myndbönd á farsímum parsins þar sem sjá má hálfmeðvitundarlausar konur og virðist sem margar þeirra hafa ekki verið í ástandi til að samþykkja að stunda kynlíf. Riley sést á mörgum myndanna. Saksóknarinn segir að því telji yfirvöld að fórnarlömbin geti verið mjög mörg.
Önnur ákæran snýr að máli 32 ára konu sem hitti parið í apríl 2016 á veitingastað í Newport Beach. Skömmu síðar buðu þau henni í samkvæmi og þegar hún var orðin drukkin fóru þau með hana heim til sín, gáfu henni lyf og nauðguðu. Allt var þetta tekið upp á myndband að sögn saksóknara. Lyfjaleifar fundust í blóði konunnar en hún skýrði lögreglunni frá málinu næsta dag.
Sex mánuðum síðar hitti parið aðra konu á bar og fékk hana heim með sér. Saksóknari segir að konan hafi vaknað þegar verið var að nauðga henni og hafi byrjað að öskra. Nágranni hringdi þá í lögregluna. Ekki er vitað hvort þetta ofbeldi var tekið upp en saksóknari segir að parið virðist yfirleitt hafa notað sömu aðferðina til að velja fórnarlömb sín. Riley fór þá og talaði við konu og bauð síðan Robicheaux til þeirra skömmu síðar.
Við leit heima hjá parinu í janúar fann lögreglan mikið magn af eiturlyfjum, þar á meðal efni sem nefnist GBH en það skerðir meðvitund og dregur úr hömlum fólks og er stundum nefnt nauðgunarlyf.
Riley og Robicheaux voru handtekin í byrjun september en voru látin laus gegn tryggingu. Þau neita sök í málinu.
