Rune Bjerke, aðalbankastjóri DNB bankans sem er stærsti banki Noregs, telur að tölvuþrjótar og fikt með tækni geti hrundið næstu fjármálakreppu af stað. Það verði því ekki svimandi háar skuldir eða áhættusæknir fjárfestar sem það gera heldur tölvuþrjótar.

Þetta kemur fram í viðtali við Bjerke í Dagens Næringsliv. Haft er eftir honum að nú þegar hafi sést mörg dæmi um hvernig er hægt að nota tæknina og stýra henni í aðra átt en ætlunin var að hún væri notuð til. Sem dæmi nefndi hann innbrot í tölvukerfi seðlabankans í Bangladess og meint afskipti Rússa af forsetakosningunum í Bandaríkjunum 2016.

Bjerke sagðist telja það góða hugmynd að mörg ríki, þar á meðal Noregur, vinni nú að þróun rafrænna varamynta. Það eru gjaldmiðlar sem verður hægt að grípa til í neyð ef ráðist verður á fjármálakerfin.