Eystri Landsréttur í Danmörku kvað fyrir nokkrum mínútum upp dóm yfir Peter Madsen sem var dæmdur í lífstíðarfangelsi í undirrétti fyrir að hafa myrt sænsku fréttakonuna Kim Wall um borð í kafbátnum Nautilius í ágúst á síðasta ári. Eystri Landsréttur staðfesti dóm undirréttar um lífstíðarfangelsi yfir Madsen.

Saksóknari flutti mál sitt í morgun og sagði að Peter Madsen væri samviskulaus öfuguggi sem hefði myrt Wall í kynferðislegum tilgangi. Hann krafðist staðfestingar á dómi undirréttar og á þá kröfu féllst Eystri-Landsréttur.

Verjandi Madsen fór fram á 14 til 16 ára fangelsisdóm yfir honum og sagði að morðið hafi ekki verið skipulagt og benti á að Madsen hefði aldrei áður hlotið refsidóm.

Peter Madsen mun því væntanlega eyða því sem hann á eftir ólifað í fangelsi við hlið harðsvíruðustu glæpamanna Danmerkur.