Ef þú sefur yfirleitt illa á nóttinni þá getur það verið til merkis um að sjúkdómur herji á þig. Það er því kannski skynsamlegt að fara til læknis ef slæmur svefn er viðvarandi vandamál. Konur ættu að vera sérstaklega á varðbergi vegna slæms svefns.
Í rannsókn sem YouGov gerði á sínum tíma eða árið 2016 fyrir bresku samtökin The Sleep Apnoea Trust Association, sem aðstoða fólk með kæfisvefn við að bæta svefn sinn, kom í ljós að 46 prósent aðspurðra kvenna glímdu við svefnvandamál. Það sama átti við um 36 prósent karlanna.
60 prósent kvennanna sögðust eiga það til að verða pirraðar á daginn vegna þess að þær höfðu ekki fengið nægilegan nætursvefn en hjá körlum átti þetta við um helming aðspurðra.
John Stradlings, prófessor og sérfræðingur í svefni og svefnrannsóknum við Oxford háskóla, sagði í samtali við breska miðla að konum finnist oft að þessi mikla þreyta, sem þær finna fyrir, sé bara hluti af nútíma lífinu en þetta geti verið til merkis um mun alvarlegri hluti. Hann sagði að ef konur finna ekki skýringuna á svefnvandamálum sínum þá geti bent til alvarlegra heilsufarsvandamála.
Svefntruflanir tengjast oft kæfisvefni, sem veldur bæði hrotum og hættulegum hléum á andardrætti. Önnur einkenni eru þunglyndi, höfuðverkur, beinverkir, fótaóeirð og þreyta. Þunganir og tíðahvörf auka líkurnar á að konur þjáist af kæfisvefni.
Ef ekkert er gert við kæfisvefni getur hann valdið hjartaáföllum og blóðtöppum. Stradling sagðist því hvetja allar þær konur sem þjást af einhverju fyrrgreindu til að leita til læknis til að kanna hvort þær þjáist af kæfisvefni. Þeim mun fyrr sem tekist sé á við vandann, þeim mun betra.