Daginn eftir gerðist nokkuð sem átti eftir að draga dilk á eftir sér. Fjögurra ára gamall sonur Matthew og fyrrverandi eiginkonu hans, Renee Burke, sagði dagmóður sinni frá nokkru sem hafði gerst daginn áður. „Mamma setti eitthvað í drykkinn hans pabba,“ voru orðin sem hann sagði.
Eftir þetta komst hreyfing á málið og upp úr krafsinu kom skuggalegt ráðabrugg Renee. Hún hefur nú verið ákærð fyrir tilraun til manndráps, líkamsárás, innbrot og fyrir að stofna velferð sonar síns í hættu. Þennan örlagaríka dag 6. september hafði hún brotist inn í íbúð Matthews og sett frostlög í vínið hans.
Renee á yfir höfði sér 25 ára fangelsi vegna málsins.
Matthew fékk veður af ráðabrugginu frá dagmóður sonar síns og þann 10. september hafði hann samband við lögreglu vegna málsins. Lögregla mælti með því að hann kæmi upp öryggismyndavél og það er það sem hann gerði. Ekki leið á löngu þar til Renee náðist á mynd hella bleikum vökva í vínflösku Matthews í eldhúsinu á heimili hans. Í þetta skiptið var átta ára dóttir þeirra með í för.
Lögregla telur fullvíst að Renee hafi ætlað að koma fyrrverandi eiginmanni sínum fyrir kattarnef vegna forræðisdeilu sem þau stóðu í. Matthew hafði fullt forræði yfir börnunum.
Lögregla gerði húsleit á heimili Renee og lagði meðal annars hald á tölvu í hennar eigu. Við rannsókn á henni kom í ljós að hún hafði leitað að ýmsu varðandi hvernig er best að eitra fyrir fólki. Lögregla virðist því hafa nokkuð sterkt mál í höndunum og má teljast fullvíst að Renne muni verja næstu árum í fangelsi.